Santiglaus an der Weihnachtsfeier 2024

E gueti Wuche nach Fürobe kunnt z Basel am Rhy
D Liederdarfele wie die alt Fasnacht hindedri.
Jedes Joor die glichi Liir:
«Mer bruche der Glaus für unseri Wiehnachtsfiir.»
E bitzeli stinkts mer, i hätt anders ztue:
Emol durepfuuse, Ruete binde, s Putze vo de Schueh!
Aber anderersits muessi wirgligg au sage:
Mi Läbe wär ärmer ohne dä jöhrlig Trip uf Basel abe.
Und i ha jo kä Härz us Stäi,
Drum kummi no, aber halt eläi.
Wenni em Schmutzli sini Feriezuelage zahle sott,
heisst das zimli sicher Privatbankrott.

Ei Frog taucht jo denn au immer no uff:
Mit de Örtligkeite all Joor das Buff!
Zerst bini ins Rothuus und ha dänggt, gopf,
Jetzt stigtsene'n'also langsam in Kopf.
Woni euch dört niene gfunde ha
Bini ins goldige Fass, nid grad näbedra.
Aber dört dien nur e paar drurigi Gstalte
Ihri Rugeli und Stange verwalte.
Im «Park im Grünen» könnts no si und ab ind Zoggeli
In d Grien '80 dört hinterem Joggeli.
I ha dänkt, wos no Dinosaurier git
Isch sicher d Liederdafele’n’au nid nid wit.
No isch's mer ko: Nid rot, nid gold, nid grien, nid nüt.
Am Rhysprung sin die Lütli hüt!
I hoff, er siged noni so blau wie das Huus.
Der bruched jetzt nämlig no'n'e bitz Pfuus.
Oder zmindest e paar vo euch do inne,
wo mir jetzt no sotte öbbis singe.
Ihr sind sicher alli gspannt wie'n'e Boge
Wär ich hüt nacheme Värsli due froge.
No fömer doch, würdi sage, grad a,
Damit i irgendwenn au wider heime ka.

Im April händer gsunge, lägg het das kracht.
I mein, der händ e rächt e gueti Falle gmacht.
Dä Mendelssohn und das Hyfridol,
I has gseh und muess sage: Wirgligg toll.
Und e Strichorkeschter het's au gha.
E Wucht, die Camerata Basilea vo der Maija.
Dasch klar, dass so öbbis guet koschtet, doch…
Und glich händer in der Kasse kei Loch.
Dasch bischpilhaft und freut mi sehr.
A propos: Gäll Danny, mir luege denn nachem Dessert.
Item, dass das Konzärt e so glunge’n’isch
Het ein e’n’Ateil, das wüscht me nid vom Disch.
Au sunscht, so im sängerische Alltagsläbe,
isch är um e Jöbbli sälte verläge.
Do kunntem allethalbe zguet,
dasser journalistischs Gschick bewise duet.
Er het Bräschte kha und het welle wüsse wo’s klemmt
Und isch vo Pontius zue Pilatus grennt.
Niemer hetem könne sage wasem fählt,
die Unsicherheit heten glaub scho’n’e bitz quält.
S het nid besseret und er het sich irgendwie e so dure gmoschtet.
Das het halt leider au e baar Probe koschtet.
Am Schluss het er sich denn unters Mässerli gleggt
Und nachere Hüft OP lauft er wider perfeggt.
Gott sei Dangg, muess me sage, schön bisch do.
Ruedi, darfsch do füre ko.

No öbber hets gsundheitlig das Joor nid grad eifach.
Wägeme’n’Armbruch… Weiss jetzt grad nid öb ei- oder
zweifach.
Im Oktober weiss me jo, s het nasses Laub.
Aber für so Rotschleg isch si gläb taub.
Uf jede Fall, zägg, Sturzflug-Alarm
Und broche'n'isch dä linggi Oberarm.
I bi froh, isch si hüt wider ganz
Und strahlt si au wider im alte Glanz.
Färner heig si für d Gruppe vo de Kultur- und Wander-Fraue
E super Programmpunkt useghaue.
E Fiehrig hän si kha im kline Klingethal
Mit der Kloschtermagd Anna, gsi sigi das phänomenal.
Die het dene Dame dört öbbis blose
Vom Veschpere und Bätte und Kloschtergarte-Krütersauce.
Si hän e glatte Nomidag gha
Und viel dängge au hüt no gärn do dra.
Für dä schön Usflug und no vieles meh
Darf d Anita jetzt e Värsli zum Beschte geh.

Im Ensemble Singvoll gits zue aller Wohl
Zum Glügg e wirgligg ruehende Pol.
Me muess sage, gloffe’n’ischs nid immer so rund
Zytewis het si s gmacht wiene Vagabund.
Mol isch si derbi gsi, denn isch guet,
Und plötzlig nimmt si wider der Huet.
Me heig nie rächt gwüsst, vorem nägschte Uftritt
Hoffentlig git si nid zur Unzyt der Ustritt?!
In letschter Zyt aber, so hani verno,
Isch si in de Probe zueverlässig praktisch immer do.
Unter all dene Fraue kunnt si in d'Kränz
Mit der absolut höggschte Probepresänz.
So isch si e lüchtends Bischpil für alli do inne,
wo in eim vo dene Chör dien singe.
Und denn kunnt si au no vo wit,
also sälbschtverständlig findi das nid.
Für die Entwigglig gits e Seggli vo mir
Gege, Andrea, e Värsli vo dir.

Au in der tafelrundi gits e junge Maa
Wo do in Sache Probebsuech mithalte ka.
Er het e grosses Härz und e tiefi Stimm
Dangg beidem ischer in de Härze vo de Kollege dinn.
Wenns luschtig goht bis spot ind Nacht
Är isch derbi und stoht Habacht.
Und näbe all däm, das findi schön.
Kümmeret er sich dehei um sini Söhn.
Sini Gfährte singe, vermuetlig au hüt,
Ihm si eiges Liedli vo Zyt zue Zyt.
I schwärm, ir mergets, für dä Schatz, he,
Bi däm glänzt wirgligg nid nur d Glatze.
Uf ei Pünktli möchti hiwiise
S wär schön,wenns goht, de würdsch der Bitrag amigs pünktlig
überwiise.
Dä woni gärn do vorne mag,
Das isch der Thierry Lützelschwab.

Eure Verein do, s isch scho frapant,
entwigglet sich jo, i sag emol rasant!
Öb zem Guete, zem Schlächte, das kame gseh wieme wott,
Aber es goht öbbis, und das findi flott!
Jetzt händer, nämmed mer das nid krumm,
zwei Grienschnäbel gwählt fürs Präsidium.
Dir wärded scho wüsse, was der miend mache,
Aber ich ha scho'n'e bitzeli miesse lache.
Der eint vo däne zwei, e hagers bärtigs Wäse,
Du, i glaub dä ka d Uhr noni läse.
Dräffe würden schomol gärn ufe Bier,
aber dä kunnt Joor für Joor z schpot and Wiehnachtsfiir.
Die ander, wo das Amt atritt
Isch au eher schmal, nur e Bart het si nid.
Aber, tant pis, es dunggt mi, si mieches nid schlächt
Und dassmene bitz Zyt git, das isch au rächt.
Also eini isch do und i zoll Reschpäggt.
Sone'n'Amt git Arbet, das schläggt kä Geiss ewäg.
Der Santiglaus Danggt für di Isatz fescht
Und wünscht der für d Zuekunft nume s Bescht!
Miteme Värsli bisch du hütte’n’au dra.
I bitt do füre: Hübsch, Hübscher, Laura.

Damit aber öbber neus ka ko,
dasch klar, muess immer zerscht ein go.
Zur Freud vo sinere Theresi
Macht er jetzt nur no der Ehrepresi.
Aber, jetzt us ihrer Sicht,
gits e Wehrmuetsdropfe in däre Gschicht.
Der Reveillechor ka’n’är, niemer wöten nä,
partout nid in anderi Händ übergä.
So het er sich erweiche loh, und machts no, das isch fein
Dängg bis zum Namensdag vo mim Kolleg, em Sankt
Nimmerlein.
Liebi Reveillechörler, jetzt rissed euch am Rieme
Dä het jo vom joorelange Buggle scho roti Schtrieme!
Hälfed däm Arme, lönd en nid elei
Und dängged an d Theres, die wott ihre Maa au emol dehei.
Es gieng ebbe do nid nur ums Verwalte,
Sondern au d Zuekumft vom RC z gschtalte.
Fürs erschti jetzt aber e warme’n’Applaus
Für Tatkraft und Gmeinsinn vo däm flissige Glaus.
S'isch Wahnsinn, was är leischte duet
Und jetzt zauberet der Ruedi sicher e Värsli usem Huet.
Im Summer händer jo amigs au e Sause.
Für mi isch das nüt, ich ha denn Saison-Pause.
Mit Goggi und Bier, Würscht und Plätzli
Weggt me mi nid us mim Summer-Rätzli.
Und eine stellt das amigs uf d Bei.
Eigentlig isch är denn amigs gar nid dehei.
Dä kunnt fürs Grillfescht und e volle Tank,
äxtra vo irgendneume ume Rank.
Är het hüffig s Risse nach färne Gschtade
No hoggt er fluggs in si Cämper-Wage,
Und macht e Reisli, mol nöcher mol wit,
Zämme mit sinere Brigitte.
Dass är denn bim Singe fähle duet,
das finde nodürlig die wenigschte guet.
Aber das muess me ihne gönne welle.
Wenn er do isch, kame nämmligg ufen zelle!
Wenndem öbbis z erledige gisch
Hesch am nägschte Tag scho s Resultat ufem Tisch.
Und öbbis darf me’n’au nid vergässe:
Ohni ihn wär ich hüt Zobe blutt do gsässe.
Für so viel Engagement und Zueverlässigkeit
Gits füre Paul e Seggli, wenner e Värsli vortreit.
D tafelrundi gits jetzt au scho 10 Joor.
Lägg mer am Arsch, s isch bald nüm wohr!
Entschuldiged bitte der Usdrugg, bi Goscht,
aber uf das nämmer nochär no eine, proscht!
Erst grad im Novämber hän die singende Recke
E fulminants Konzärt könne'n'anelegge.
Die Buebe sin äfach usem rächte Holz.
Lönd euch sage: Dir erfüllet der Santiglaus mit Schtolz!
Als kleine Huffe hän si agfange mit ihre Sangesfaxe;
Das het scho öbbis brucht, dass das het könne waggse.
Zämme luschtig ha isch nodürlig nätt,
Aber d Qualität muess au schtimme dasses fäggt.
Do stoht’ene an der Sitelinie eine parat,
E richtigi Dirigäntebombe'n' im Quadrat.
Mit Könne und Charme hett er s Publikum im Sagg
Und immer au si Sängerpagg.
I bi sicher, wenni mer wünsch vo ihm,
Dass er’s no lang macht, redi für alli do inn.
Liebe Philippe, heb Dangg vo jedem Bass und Tenor!
Viel Erfolg mit der tafelrundi in de kommende Joor.
Und jetzt simmer nodürlig gspannt.
Für dini Värsli bisch jo bekannt.

Sodeli, das wäre die gsi, wo’n’ich ha welle'n'erwähne.
I hoff, s heig niemer miesse gähne.
Wenns jetzt no Kinder umme hätt,
Fände die das vilicht nätt,
wenn si au no dörfte e Värsli sage
und denn e Seggli heime drage.
Also Kinder, sind nid Schüch,
vo mir gits Nüssli und Schoggi für euri Büch.

Jetzt gits vilicht no Lüt, wo die oder dä
Au no öbbis wänn zum Beschte gä.
Do sagi numme «Freiwillige vor».
E neui Chance git's erscht im näggschte Joor.

So, jetzt händer sicher langsam s Ohremuffe
Ich gang jetzt wider in Schwarzwald uffe.
Schön ischs gsi, i has wirkligg gnosse
Und au e baar griehrti Dränli vergosse.
E Freud hätti, wenner mer diend e Liedli bringe,
Und bim Usego «Im Schwarzwald schtoht e Hüsli» singe.
Jetzt wünsch i euch none schöne Räscht
Und gönd doch bitte nid z schpot ins Näscht.
Lueged guet und blibed gsund,
denn laufts au im '25 wider rund.
Mer gsehn is; wär weiss in welere Beiz, Estrich oder Käller.
Dir nämmet jo alles, dunggts mi, der Gschwinder isch der Gschnäller.

Danksagung

Danke dem Santiglaus!
Danke Urs Brunner für die Bilder!

Und herzlichen Dank Sandra Schmid für die Organisation dieses wunderbaren Anlasses!